Хүний ертөнц сүнсний хот хоёрыг холбодог бадмаарган хаалган дээр цацаг чимгээр гоёсон хувцастай бүсгүй шүхэр барин зогсоно.

Ийш тийш хяламхийн хөмсөг зангидаж буйгаас нь үзвэл хэн нэгнийг нилээд удаан хүлээж байгаа бололтой.

Төдөлгүй Донхэ гартаа анхаарал татахуйц хүрэн өнгөтэй арьсан цүнх барьсаар бүсгүй дээр ирснээ гэнэтхэн чангаар хөхрөх нь тэр.

-Чи арай хүний ертөнц рүү ингэж явах гээгүй биздээ? Бурхан минь гэж, Жуи..наад балар эртний хувцсаа тайл.Чи яг л 16-р зууны хүйтэн сэтгэлт боолын худалдаачин шиг харагдаж байна, багт наадам л биш бол 21-р зуунд хэн ч ингэж хувцаслахаа больсон.

Бүсгүй хачин царайлснаа үг дуугүй залууг мөрлөн эргэн өөрийн шилтгээн рүүгээ зүглэв.

Донхэ санаа алдан "Ахх, би уг нь чамаас 2000 жилээр ах юмсан, чи надаас өндөр албан тушаалтай гээд ингэж увайгүй аашлах хэрэгтэй юм уу" гэхэд гүйх шахам алхаж байсан Жуи огцом дороо зогсон хүйтэн харцаар залууг сонжин ширтлээ.

Залуугийн хэлдэг зөв, тэр эелдэг харагддаг ч тэнгэрийн оронд хөл тавьж чаддаг цор ганц эрлэгийн элч. Дээрээс нь хамгийн ахмад эрлэгийн элч учир газар доорх ертөнцөд ч нөлөө үзүүлж чадах хүчирхэг чөтгөр. Донхэ хүсвэл Жуин сүнсийг одоо ч хамаагүй үхэлд тушааж дөнгөнө.

-Харин чи ? Эрлэгийн элч байж ам нээх болгондоо эцэг бурхны нэрийг дууддаг чинь жинхэнэ увайгүй үйлдэл юм биш үү. Нэг ярьснийх шулуухан хэлчихье, бурхан биднийг хаясан. Тиймдээ ч би дэлхийгээс зайгаа барьж сүнсний хотыг босгосон. Бидэн шиг хүмүүс урдах ажлаа олигтойхон хийвэл л барав.

1000жил тутамд бүсгүй өөрийн мэдэлгүй хэг ёг авирлаж эхэлдэг. Тэнгэрийн оронд төрсөн байж ямар ч гэм хийгээгүй байхдаа хөөгдөж ахин хэзээ ч тэнд хөл тавиагүйдээ, бас тэр бурхан гэгч өөрт нь хачин ажил даалгачихаад хөсөр хаясан байж 1000 жил тутамд шийтгэж байгаа аятай дэлхий рүү албадаж явуулдаг нь яавч байж болшгүй зүйл мэт санагдана.

Тэд явсаар гантиг шилтгээнд очиход үйлчлэгчид залуугийн заавраар бүсгүйд шинэ хувцас оёхоор яаравчлав.

Донхэ өнөөх арьсан цүнхнээсээ бичиг баримт бололтой, тамга тэмдгээр дүүрэн баахан цаас гарган бүсгүйд атгууллаа.

-Наадах чинь энэ удаагийн даалгаварт оноогдсон хүний мэдээлэл. Залуухан царайлаг хүү шиг санагдсан, ямартай ч чи уйдахгүй байх. Тэнгэрийн орон ч хэрцгий шүү, ийм хөөрхөн хүүд ийм эрт үхэл төлөвлөж байдаг..

Жуи бичиг баримтуудтай танилцах хоорондоо "Өнчин, ядуу, боловсролгүй. Моделийн цагийн ажил хийдэг тулдаа л өөрийгөө тэжээж дөнгөдөг юм шив дээ. Байдаг л нэг азгүй амьтан" хэмээн бувтнахтай зэрэгцэн тасалгааны хаалга онгойж үйлчлэгчид бэлэн болсон хувцсыг эзэндээ өргөн барилаа.

Төдөлгүй бүсгүй өнөөх хувцсыг сольж өмсөөд Донхэ дээр очиход залуу сая л нэг юм санаа амрав уу гэлтэй зөөлнөөр мишээж "Одоо л орчин үеийн амжилттай яваа залуу авхай шиг харагдаж байна" хэмээн шивнэв.

...

21-р зуун. Техник технологи, шинжлэх ухаанд үсрэнгүй хөгжил авчирсан цаг.

Хөл хөдөлгөөнтэй хотын гудамж , гоёж гоодсон залуус, гэрлэн чимэг, зугаа цэнгэлээр дүүрэн орчин үеийн хот бүсгүйд нэг л танил бус.

Донхэ удаанаар алхангаа орчныг нэгд нэгэнгүй ажиглах бүсгүйг шоолон хөхөрж "Жуи чамайг хамгийн сүүлд 1000 жилийн өмнө хүний ертөнцөд ирснийг чинь ойлгож байна л даа..гэхдээ эндэх сүнсний ертөнцөөс нэг их ялгарахгүй болохоор анх удаа хүн харж байгаа харийн биет шиг аашлахаа боль, чи хэтэрхий их анхаарал татаад байна" гэхэд бүсгүй санаа алдлаа.

-Зүгээр л.. нэг л дасаж өгөхгүй байна. Цэлмэг тэнгэр, жаргалтай хүмүүс. Тэд яагаад инээгээд байгаа юм? Сүнсний хот бол баяр баясалгүй хоосон биетээр дүүрэн дүнсгэр газар. Гэтэл эндэх..нүд гялбуулам юм. Гэхдээ түүнээс илүүтэйгээр анхаарал татаж байгаа зүйл гэвэл энд хэтэрхий олон чөтгөр байна.

Бүсгүйг ийн шивнэхтэй зэрэгцэн залуу эр зогтусан орчин тойрноо ахин нэг ажиглалаа. Тийм ээ, зөрж өнгөрөх 100 хүн тутмын нэгнийх нь хүүхэн хараа энгийн хүнээс тэс өөр байх нь тэр.

Яалт ч үгүй энэ чөтгөрүүд ямар нэг зорилготойгоор энд байгаа мэт яг л энгийн хүн шиг аягласаар хэдэн зууныг өнгөрөөгөө юу гэлтэй, хүмүүс дунд хэдийн уусаж орхижээ.

-Жуи, эд нарт санаа зовох хэрэггүй. Ийм доод зэрэглэлийн чөтгөрүүд Люсиферийн зөвшөөрөлгүйгээр юу ч хийх эрхгүй байдаг юм. Тэд зүгээр л цаг нөхцөөж жижиг сажиг хор хутгаж явдаг биз. Чи зүгээр л хийх ёстойгоо хийхэд болно. Чиний зорилго бол чөтгөр агнах биш хамтран амьдрагчийнхаа сүнсийг тамруу илгээх. Энэнд л анхаар.

Залуу эр ахин цаг алдахгүйн тулд бүсгүйг хөтлөсөөр даалгаврын эзний гэрийн үүдэнд ирлээ.

- Хүний амьдралыг таашаах хэрэгтэй шүү , за юу. Ямар нэг юм болвол эргэлзэлгүйгээр ахыгаа дуудаарай. Инээж, уйлж, уурлаж , гомдоод..мэдрэмжээ чөлөөтэй байлгаарай. Бидэн шиг мөнхийн амьтай махбодоос ялгаатай нь хүний амьдрал цаг үргэлж гялалзан гялтганадаг. Хүмүүс мэдэрдэг болохоор л үхэгсдээс ялгаатай байдаг юм шүү дээ.

Донхэгийн харц хачин гунигтай байх агаад яагаад ч юм эцсийн салах ёсоо гүйцэтгэж байгаа мэт авирлах нь хачин.

-Юу вэ, ахаа. Битгий ингэж хараад бай, би одоо жаахан охин биш болохоор алзахгүй дээ. Санаа амар буц. Намайг байхгүйд сүнсний хотыг сайн харж хандаарай. Сарын дараа уулзацгаая.

Залуу эр инээмсэглэн бүсгүйн захиасыг дуулгавартай нь аргагүй дагахаа илэрхийлж байсан хэрнэ "Сарын дараа уулзацгаая" гэсэн үгсийг сонсмогцоо гэнэтхэн харц буруулж хормын дотор агаарт сарнин алга боллоо.

Жуи залуугийн хачин авирыг нэг их анхааралгүй "Учир нь олдохгүй хүн шүү, яриагаа дуусгаж амжаагүй байхад явчих юм" хэмээн бувтнаад одооноос эхлэн амьдрах гэрийнхээ хаалгыг итгэлтэй нь аргагүй татан орлоо.

Олон давхар орон сууцанд байрлах тохилог 2 өрөө байр. Ганцаараа амьдардаг залуу хүүд бол яг тохирсон оромж.

Нүсэр тавилгагүй классик хэв маягийн тохижилттой байрны нэг ханан дээр олны дунд "Люсиферийн нулимс" хэмээн алдаршсан зургийн эх хувь хадаатай байх нь нэг л зохимжгүй харагдана.

Гэрийн эзэн одоо ч нойрсож байх шиг, хаалттай хаалганы цаана жигд хэмнэлээр амьсгалах дуу сонсдох аж.

Бүсгүй буйдан дээр тухлан гэрийн эзнийг сэрэхийг хүлээнгээ зурагт асааж орчин үеийн амьдралыг тольдохоор шийдэв.

Хэсэг хугацааны дараа модон шал чийхран унтлагийн өрөөний хаалга нээгдэж залуу хүү нойрмог нүдээрээ гэрт нь тухлах урилгагүй зочин руу гайхан ширтлээ.

-Уучлаарай, өөрөө энд юу хийж байгаа юм? Үгүй ээ, яаж орж ирсэн юм? Бусдын гэрт хулгайгаар орох гэмт хэрэг гэдгийг мэдэх үү. Цагдаа дуудахаас өмнө гарсан чинь дээр шүү.

Чамин савхин хүрэм хөдөрсөн турьхан бүсгүй яавч дээрэмчин шиг харагдахгүй нь лав. Тиймдээ ч залуу эр хүлээцтэй хандаж байх шиг.

Бүсгүй ихэмсгээр өндийн босож залуу руу цоо ширтэнгээ аажмаар дөхөх нь жихүүцмээр.

-Жон Жэ Вон, 26 настай амжилттай яваа модел..яахав хүний ертөнцийхнөөр бол чи идэр залуу нэгэн ч миний хувьд бол зүгээр л нялх хүүхэд. Донхэ ахын хэлдэг зөв байж, чи ийм жаахнаараа үхэхэд хэтэрхий харамсалтай юм. Харуусмаар..үзэсгэлэнтэй төрх байна.

Залуу хөмсөг зангидан "Үхэх? Больж үз. Харин чи л сэтгэцийн өвчтэй гэхэд хэтэрхий хөөрхөн юм. Яалт ч үгүй цагдаа биш сэтгэцийн эмнэлэг рүү залгасан нь дээр юм байна" гэхэд бүсгүй бухимдан хуруугаа имэрч, ердөө тэгэх төдийд л гарт нь цусан судалтай хурц ирт хадуур бий боллоо.

Жэвон цочиж сандарсандаа орилон арагш ухрахдаа өөрийнхөө хөлөнд тээгэлдэн газарт унахад бүсгүй хадуурныхаа ирийг залуугийн хоолойд тулгах нь тэр.