Жон Жэвоны гэр.

Чой Сан шилбээ барин "Муу галзуу өлөгчин минь, чи надад ямар новшоо хийчих нь энэ вэ!" хэмээн бархирахад түүний нүднээс нулимс дуслах аж.

Залуу эрийн шилбэний булчин арьсан дотроо яснаасаа салж хэдэн хэсэг болон бутарсан байх ба чөтгөрийн бие нь гэмтэлд даруй хариу үйлдэл үзүүлэн хэдэн минутын дараа эдгэвч төдөлгүй ахин задарч байлаа.

Жуи уруулаа шилэмдэн Саны эрүүнээс атган өөрлүүгээ татаж "Оройтоогүй дээр одоо намайг эзэн рүүгээ хүргээд өгчих, тэгвэл би чамд хийсэн хараалаа хариулъя" гэхэд хөвгүүн өвдөлтөөсөө болж ярвайн "Би түүнийг хаана байгааг мэдэхгүй. Мэдэхгүй гэж байна! Би бараг чамд 1000 удаа мэдэхгүй гэж хэлсэн. Хүний хэл ойлгодоггүй юм уу? Эсвэл би чамд чөтгөрийн хэлээр ахиад 1000 удаа хэлж өгөх ёстой юу?" хэмээнэ.

Бүсгүйн хүүхэн хараа час улаан өнгөөр тодроход тэрбээр заналтай нь аргагүй "Сание, энэ хараал хэр хүчтэйг мэдэж байна уу? Чи 24 цагийн турш бүх булчин чинь ээлжлэн задрахыг мөн хэрхэн эргэн нийлж эдгэрэхийг нэг бүрчлэн мэдрэх болно. Үүний дараа чи ахин тайзан дээр гарч дуулж бүжиглэх нь битгий хэл доголохгүй алхаж ч чадахгүй. Чи ахин дахин өөрийгөө нөхөн сэргээх чадалтай чөтгөрийн биетэйдээ харамсаж намайг хурдан алаад өг гэж надаас гуйна. Харин дараа нь? Люсиферийн хаана байгааг хэлж өгөлгүй өнгөрөөсөн цаг болгоны чинь төлөө би чиний тэгтлээ нандигнаад байдаг хамтлагийн гишүүдийн чинь ясыг нэг нэгээр нь хугална. Тэдэн шиг сул дорой хүн төрөлтөн тэр тамлалаас амьд гарж ирэхгүй л болов уу" хэмээн шивэгнэлээ.

Сан уурандаа бүсгүйг боомилохыг оролдсон ч үүнтэй зэрэгцэн түүний зүүн гарын шөрмөс тасарч хөвгүүн орилсоор шалан дээр эвхрэн хэвтэв.

Энэ нүд халтирам үзэгдлийг хөндлөнгөөс ажиж зогссон Жэвон Жуин гараас зууран "Алив ээ , тэр мэдэхгүй гээд байна шүү дээ. Зүгээр явуулчихаач дээ" гэхэд бүсгүй "Чи намайг нэг муу зальтай чөтгөрийн үгэнд итгэнэ гэж санаа юу. Тэр надад үнэнийг өчтөлөө эндээс нэг ч алхам холдохгүй" хэмээн ширэв татна.

Сан нэг гар дээрээ тулан арайхийн өндийхөд хөвгүүний нүдэнд цус хурсан байх аж.

- Яагаад надад ингэж хандаж байгаа юм? Энэ хараал идсэн дэлхий дээр хэдэн мянган чөтгөр байхад. . яагаад надад ингэж хандаж байгаа юм бэ?

-Учир нь би ингэж чадах болохоор. Чамайг тамласан ч, алсан ч хэн ч надтай хариуцлага тооцохгүй болохоор. Бас хамгийн чухал нь..чи хайрлаж бас хайрлуулсан болохоор.

Хөвгүүн зогтусахад Жуи уруулаа хазлан " Хайрлах нь диваажингийн гялбааг хүртэх явдал юм..гэж эцэг бурхан хэлсэн байдаг. Гэтэл чам шиг дорд чөтгөр хүнийг хайрласан. Хараал идсэн хамтлагийн гишүүд чинь. Чи тэднийг хайрлаж бас тэднээр хайрлуулсан. Хайр гэдэг чиний өрөвдмөөр үнэ цэнгүй амь насанд чинь хэтэрхий гоёдсон зүйл биш гэж үү? 3000 жил бурхдад зүтгэсэн би хүртэл тийм зүйлийг мэдэрж амжаагүй байхад" хэмээн бувтналаа.

Төдөлгүй хөвгүүн бүх өвдөлтөө умартав уу гэлтэй дээш харан хэвтэж галзуурсан мэт чангаар инээж эхэллээ.

-Үхлийн бурхан Жуи.. хахах, чи ч жинхэнэ өрөвдөлтэй новш юм даа. Өөрт байхгүй зүйлийг хүчээр ч болов булааж авах гээд чадаагүй болохоор одоо үгүй хийх гэсэн юм биздээ. Алив ээ , тэг л дээ. Намайг хэдэн хэсэг хэрчээд хая. Миний аз жаргал үгүй боллоо гээд чи аз жаргалтай болж чадна гэж бодоо юу. Битгий мөрөөд! Чи хэзээ ч хайрыг мэдрэхгүй бас хэзээ ч хайрлуулж чадахгүй. Чи үргэлж гансрал ганцаардлаар дүүрсэн сүнсний хотдоо баяр баясалгүй амьдралаар амьдарсаар тэндээ ялзарч дуусна.

Жуи хүндээр амьсгалан Сан руу ойртоход Жэвон бүсгүйн гарнаас зууран хүчээр унтлагын өрөөнөөс чирч гаргалаа.

-Нэг муу хүн байж яаж наад бохир савраа надад хүргэж чадаж байна аа! Яг одоо замаас зайлахгүй бол би энэ муу чөтгөрийн зулбасгыг там руу явуулчихаад дараа нь чамайг араас нь илгээчихнэ шүү.

Тасхийх дуу хадахад жаалхан охин нүүрээ даран газарт унаж тэрхэн зуурт уурандаа улайссан хүүхэн хараа нь эргэн хэвийн байдалд шилжив.

Жэвон энэ удаад үнэхээр уурласан бололтой, бүсгүй рүү их л жигшингүй харц шидлэх аж.

-Би эмэгтэй хүнд гар хүрдэггүй ч энэ удаад үнэхээр тэвчихгүй нь! Жуи, энэ яргаллаа зогсоо. Чи тэр хөгийн хотдоо юу хийдэг байсан чинь хамаагүй. Гэхдээ энд, миний гэрт хэн ч ингэж тарчлах ёсгүй. Ойлгов уу? Улс даяар эрэн хайх ажиллагаа явуулж "Алдартан Чой Сан барьцаалагджээ" мэтийн тэнэг нийтлэл гаргуулж өөрсөддөө лай удах гээгүй л юм бол одоо явж ховс ч юм уу нэг юм хэрэглээд энэ асуудлаа зохицуул.

Жуи сая л ямар том асуудал дэгдээснээ ойлгосон мэт "За яахав" гэснээ агаарт замхарлаа.

Залуу эр нэг санаа алдаад гал тогооноос цэвэрхэн хутга аваад эргэн унтлагын өрөө лүү оров.

Сан одоо ч шалан дээр эвхрэн хэвтэх агаад үе үе яраглан дуу алдана. Түүний өмссөн чамин өмсгөл хүйтэн хөлсөнд нь нэвт норжээ.

Тог..Тог..

Шалан дээр цус дуслана.

Сан Жэвоны хөлнөөс зууран өндийсөөр түүний хөлд сөгдөнгөө шархалсан бугуйнд соёогоо зооход Жэвон бяцхан чөтгөрийн толгойг илэн "Сайн хүү байсны чинь шагнал, цаашдаа ч бас амаа татаж явах хэрэгтэйгээ мэдэж байгаа биздээ?" хэмээн доогтой инээв.

Сан толгой дохисноо цусанд ханасан бололтой, соёогоо долоочихоод эгц арагш ор луу унан тааз ширтэн хэвтлээ. Түүний бие хавьгүй дээрдсэн нь илт.

-Мэдээж. Харин чи..амлалтаа зөрчих ёсгүйгээ мэдэж байгаа биздээ?

Жэвон жуумалзан хөвгүүний дэргэд суулаа. Саны шанааг илбэх гар нь аажмаар доошилж хуруугаараа эгэм төвөнхийг нь тэмтэрнэ.

-Санаа зоволтгүй дээ, би чиний хөөрхийлөлтэй хөвгүүдэд сайн санаа тавина. Тэргэл сартай шөнө хүртэл л тэвччих. Жуин хамгийн их итгэдэг эрлэгийн элч хүртэл бидний талд байгаа, төлөвлөгөө бүтэх нь цаг хугацааны л асуудал болсон.

Сан биеэр нь тэнүүчлэх Жэвоны гараас атган "Цаг хугацааны л асуудал гэнэ шүү. Энэ байдлаараа бол би нэг их удахгүй энэ солиотой хүүхний чинь гарт үрэгдэх биз" хэмээн хэдэрлэхэд Жэвон инээд алдан "Юу вэ, би чамайг хаяхгүй гэдгийг мэдсээр байж гомдоллож гэнэ. Юу ч болж байсан би чамайг хамгаална. Амлаж байна, чи үхсэн ч миний л гарт үхэх ёстой" гэх нь тэр.

Энэ хооронд Жуи хаалганы цаана амаа даран ирснээ мэдэгдэхгүйг хичээн чимээ чагнан зогсоно.

- Жэвонаа..чи яг хэн юм бэ?