اللهم صلِ وسلم على نبينا محمد وعلى آله وصحبه أجمعين

بسم الله نبدأ

جلس على مكتبه و فتح احد ادراج المكتب و طلَّع منه دفتر متوسط الحجم التقط قلم و فتح الدفتر و بدأ يدوِّن / يمتلئ هذا الكون بأشياء غريبة جدًا و أشياء ما نعرف الحكمة منها

دائمًا اتذكر هذي المعلومة اللي قالها لي واحد من اخوياي

'' سمع البشر و بصرهم محدود و هذا لحكمة طبعا''

بعدها اخاطب نفسي و اسألها

وش السبب؟؟

كيف اقدر اخلي سمعي و بصري مو محدود؟؟

طيب لو كنا احنا البشر نسمع و نبصر بشكل اكبر وش راح يصير؟؟

هل فيه اشياء ربي ما يبينا نشوفها و نسمعها؟

صرت ابحث و ابحث في كل المواقع و اسأل كل من اعرف

كيف اقدر انفذ اللي افكر فيه

بس ما فيه طريقة

بديت احس برغبة شديدة في اني اروح لعالم الجن

تذكرت ان فيه شي اسمه '' الإسقاط النجمي''

و اخيرا بعد بحث طويل و عميق في المواقع و الكتب و في جميع مصادر البحث

توصلت لطريقة الإسقاط النجمي

بشرح الإسقاط النجمي بشكل مبسَّط

الإسقاط النجمي هو خروج الروح من الجسد بعد عمل طقوس معينة

طبعا اذا خرجت الروح من الجسد تقدر تسافر لاي مكان و ممكن تشوف الارواح الثانيه و هذا بعد ممكن يخلينا نقدر نشوف الجن حسب توقعاتي

و سمعت انه مو دائكا تقدر ترجع الروح للجسد مرات ما ترجع و هذا يتسبب بالضرر للي سوا الإسقاط النجمي

قررت اني اجرب و قبل لا ابدا بكتب عن تجربتي هذي و بعد ما اسويها بكتب نتيجتها

اتمنى تنجح هذي التجربة

اوه نسيت اعرفكم على نفسي واضح من الحماس نسيت

على العموم انا ياسر

احب ابحث عن الأشياء الغريبة و الغامضة

و أكثر أمنية اتمناها اشوف جني قدامي و اتكلم معه

امنيتي غريبة و اي احد يعرف امنيتي يقول لي ذي العبارة

'' مجنون انت ''

يعتبر هذا الشي جنون بس فيني فضول اعرف

كيف حياتهم؟

بأي لغة يتكلمون؟

كيف أشكالهم؟

اوفف اسئله كثيره في عقلي

المهم كتبت كل هذي الأشياء قبل لا اروح اودي نفسي بداهية

يمكن ما ارجع بعد ذا الإسقاط النجمي

و يمكن اقدر ارجع

و ممكن ما يضبط معي اصلا

بس صدق صدق اتمنى يضبط

قفل هذا الدفتر و قام من مكانه و بدا يسوي الطقوس اللي يبدأ فيها الإسقاط النجمي

كان متوقع و متأمل انه بيضبط معه

بس ولا شي ضبط

طيح نفسه من على السرير و هو يتحلطم / افففف ليش ما ضبط معي سويت كل شي مكتوب بس ما ضبط يا ربيي فيني فضول اعرف كل شي عنهم و اعرف سبب إعطاء الله لنا سمع و بصر محدود

سمع صوت اشعار في جواله قام و اخذ جواله و لقى اخته كاتبة له / محد يذاكر يعني؟؟ بيني و بينك جدار ترا ازعجتنا و بعدين خبل انت عشان تسوي كذا مهبول انت اذا ما هجدت بعلم امي

كتب لها و هو زهقان منها / مالك دخل