.....

ချီကွမ်းယာ၏စကားများကိုကြားလိုက်ရရာ လင်းယွဲ့၏အပြုံးမှာမသိမသာလှောင်ပြောင်ဟန်စွက်သွားပြီး သူကစကားမပြောခင်တွင် လင်ရှောင်းဂိုဏ်းကိုတစ်ချက်စိုက်ကြည့်လာသည်။

"မိတ်ဆွေတို့၊ ကျွန်တော်တို့ကဒီမှာဓားရေးလေ့လာဖို့ရောက်နေကြတာ။ ဒီလိုပဋိပက္ခသေးသေးလေးကြောင့် ကျွန်တော်တို့ထိခိုက်သွားလို့ရှိရင် သိပ်ကြည့်ကောင်းမှာမဟုတ်---"

သူချက်ချင်းတန့်ကာပြောလိုက်သည်။

"မင်းတို့ကျွန်တော့်ရှစ်တိကိုတောင်းပန်လိုက်တာကောင်းမယ်လို့ထင်တယ်။ အဲ့ဒါဆိုရင် ဒီကိစ္စပြီးသွားလိမ့်မယ်၊ ဟုတ်ပြီလား။"

လင်းယွဲ့ကစကားလုံးအနည်းငယ်ကိုပြောလာပြီး နောက်ဆုံးစကားကိုကြားလိုက်ရသော် လင်ရှောင်းဂိုဏ်းသားများမှာဒေါသထွက်ထွက်ဖြင့်ရယ်မောမိတော့မည်ပင်။

ကွေ့ရီဂိုဏ်းသားများကသိသိသာသာကိုအမှားလိုက်ရှာနေခြင်း!

ရှောင်းနဥ်အာဟာလည်းဤတစ်ခေါက်တွင်လိုက်လာခဲ့ပေမဲ့ သူမဟာဓားရေးယှဥ်ပြိုင်ဖို့အရည်အချင်းမပြည့်မှီဘဲ ဤနေရာကိုလာလေ့လာခြင်းဖြစ်သည်မို့ သူမအရမ်းဒေါသထွက်မိပေမဲ့စကားမပြောပေ။

ယခုတွင်သူမနောက်ဆုံးတွင်သည်းခံနိုင်စွမ်းမရှိတော့ဘဲ ပြက်ရယ်ပြုလိုက်သည်။

"ဒီလောကကြီးထဲမှာ အဖြူအမည်းပြောင်းပြန်လှန်ပြီး အမှန်နဲ့အမှားကိုဇဝေဇဝါဖြစ်စေတဲ့ အရှက်မရှိတဲ့ကျင့်ကြံသူတွေရှိနေသေးတာပဲ၊ ကွေ့ရီဂိုဏ်းကသူ့ရဲ့ဂုဏ်သတင်းနဲ့သိပ်ကိုထိုက်တန်ပါပေတယ်၊ ကျွန်မမျက်မြင်တွေ့လိုက်ရပြီ!"

သူမအသံကရှင်းလင်းနေပေရာ ဂိုဏ်းသားတချို့မှာပြက်ရယ်ပြုလိုက်ကြသည်။

လင်းယွဲ့၏မျက်နှာမှာမသိမသာမှောင်မိုက်သွားရကာ သူကသူမကိုမိန်းကလေးတစ်ယောက်အဖြစ်ပင်မမြင်ပေ။ သူကသူမကို"အရိုအသေမဲ့လိုက်တာ"ဟုဆိုကာတိုက်ခိုက်လာသည်။

ထိုအသံနှင့်အတူ၊ သူသည်သူ၏ဝတ်ရုံလက်ထဲမှရေခဲအဆောင်စာရွက်ကိုပစ်လွှတ်လာကာ ပတ်ဝန်းကျင်ရှိရေငွေ့များမှာ ရုတ်တရက်ရေခဲချွန်များအဖြစ်သို့ငွေ့ရည်ဖွဲ့သွားကာ လင်ရှောင်းဂိုဏ်းဆီဦးတည်လာသည်။

ယင်းချန်ကားရှောင်းနဥ်အာစကားပြောလိုက်သည့််အခိုက်အတန့်တွင်ပြင်ဆင်ထားပြီးသားဖြစ်ရာ တစ်ချိန်တည်း၌မီးအဆောင်စာရွက်ထွက်ပေါ်လာပြီး မီးတောက်မီးလျှံများကဟုန်းဟုန်းတောက်လာကာ လေထဲရှိရေခဲကိုတားမြစ်လိုက်သည်။

နှစ်ဦးသားသည်သူတို့၏စွမ်းအင်ကိုနှိုးဆွကာ မီးလျှံတစ်စုကကောင်းကင်ယံတွင်ရေခဲချွန်ကိုလောင်မြိုက်သွားသည်ကိုမြင်လိုက်ကြရသည်။ ရေခဲအရည်ပျော်သွားကာ ရေစက်များအဖြစ်ပြောင်းသွားသည်။

သို့သော် တစ်ချိန်တည်း၌ ထိုရေစက်မှာရေခဲအဖြစ်သို့ပြန်လည်ငွေ့ရည်ဖွဲ့သွားပြီး ရေခဲချွန်အသစ်ဖြစ်သွားသည်။

နှစ်ဦးသားခေါင်းချင်းဆိုင်နေသည်ကိုမြင်လိုက်ရရင်း လင်ရှောင်းဂိုဏ်းနှင့်ကွေ့ရီဂိုဏ်းနှစ်ဖက်စလုံးရှိဂိုဏ်းသားများမှာ ဂုဏ်သိက္ခာစောင့်ထိန်းမနေတော့ဘဲ ဓားများဆွဲထုတ်၍ သူတို့လက်ကိုလှုပ်ရှားလိုက်ကြသည်။

ချီကွမ်းယာသည်အစကတည်းကကျန်းရွေ့ကိုစောင့်ကြည့်နေခဲ့ခြင်းပင်။ သူကတိုက်ခိုက်မှုကိုမြင်လိုက်ပြီးမကြာမီတွင် ဓားဆွဲထုတ်၍ကျန်းရွေ့ကိုထိုးကာ ပြောလာသည်။

"ငါမင်းရဲ့အစွမ်းအစကိုလာလေ့လာမယ်!"

ကျန်းရွေ့ကတိုက်ခိုက်လိုခြင်းမရှိဘဲ ပြန်လည်ခုခံကာ တစ်ချိန်တည်း၌ပြောလိုက်သည်။

"ချီမိတ်ဆွေ၊ ကျွန်တော်တို့ကြားမှာဘာရန်ငြိုးရန်စမှမရှိဘူးလေ! ခင်ဗျားဘာလို့ကျွန်တော့်ကိုပြဿနာရှာနေရတာလဲ!"

ချီကွမ်းယာကဆိုသည်။

"ငါကြားတာကတော့ မင်းကရှုလင်ကျားကိုအစားထိုးပြီး လင်ရှောင်းချီဇုန်မှာနေရာယူလိုက်တယ်ဆို၊ ဟုတ်တယ်မလား။ ဒီတော့မင်းကသူ့ထက်ပိုတော်တယ်လို့ဆိုလိုတာမလား။"

ကျန်းရွေ့ပြောလိုက်သည်။

"အဲ့ဒါကရှစ်စွင်းရဲ့မေတ္တာကြောင့်ပါ။"

ချီကွမ်းယာကပြက်ရယ်ပြုလာသည်။

"အမှန်ပဲလား။ ငါမမျှော်လင့်ထားတာက အဲ့ဒီ့နှစ်ကဓားကျိုးအတွက်ငါသူ့ကိုလက်စားတောင်မချေရသေးဘဲ သူကတစ်ယောက်ယောက်လက်ထဲမှာရှုံးသွားမယ်လို့လေ! ငါမင်းရဲ့အစွမ်းအစကို​မြင်ချင်တယ်!"

သူတို့နှစ်ဦးစကားမပြောမီ၊ တိုက်ကွက်ပေါင်းများစွာထုတ်သုံးပြီးကြပြီဖြစ်ကာ ကျန်းရွေ့ပိုတိုက်ခိုက်လေလေ သူပိုမိုကြောက်ရွံ့လာလေလေပင်။

ချီကွမ်းယာ၏စကားလုံးများနှင့်အပြူအမူတို့က အလွန်ခက်ထန်သည်ကိုသူအစကမြင်လိုက်ပြီး တစ်ဖက်လူကိုအလိုလိုက်ခံထားရသည့်သခင်လေးတစ်ယောက်ဟုတွေးမိပေမဲ့ ဤလူ၏ဓားရေးကလျင်မြန်ဖျတ်လတ်ကာ စိတ်ဝိညာဥ်စွမ်းအားကရှည်လျားပြီးအလျှံအပယ်ဖြစ်ကာ သူဟာတကယ့်ကိုစွမ်းဆောင်နိုင်မည်ဟုမထင်ထားခဲ့မိပေ။

သူကတကယ့်ကိုကံဆိုးသည်ဟုသာလျှင်ကျန်းရွေ့ခံစားလိုက်ရပြီး ဤကား ရှင်းလင်းစွာပင် ရှုလင်ကျားရန်စခဲ့သည့်ရန်သူဖြစ်ပါရက်နှင့် အဆုံးတွင်ထိုသူ၏အမုန်းတရားကသူ့ပေါ်ကျရောက်လာခဲ့သည်။

သူ့စိတ်ထဲကပုဂ္ဂိုလ်ကိုအလျင်စလိုပြောမိသည်။

"ကျွန်တော့်ကိုကူညီပါအုံး! သူကရှုလင်ကျားလက်ထဲမှာတစ်ခါရှုံးနိမ့်ခဲ့ဖူးတယ်။ ကျွန်တော်သူ့ကိုရှုံးသွားလို့ရှိရင် ကျွန်တော်ကရှုလင်ကျားထက်ပိုညံ့တဲ့ပုံပေါက်သွားမှာ၊ တကယ်ပဲမျက်နှာပျက်ရလိမ့်မယ်!"

ချီကွမ်းယာ၏အတွင်းပိုင်းနားလည်မှုနှင့်ရုပ်ပိုင်းဆိုင်ရာခွန်အားမှာအလွန်ကောင်းမွန်လှပြီး သူဟာရှုလင်ကျားကိုရှုံးပြီးနောက်ပိုင်းတွင် အမြဲတစေအရှက်ရနေခဲ့သည်။

ဤနှစ်များအတွင်းတွင်၊ သူဟာတစ်ဖက်လူ၏ဂုဏ်သတင်းကြီးမားသထက်ကြီးမားလာသည်ကိုနားထောင်နေခဲ့ပြီး သူအပြင်းအထန်လေ့လာရင်းလေ့ကျင့်ရင်းဖြင့် တစ်နေ့မှာထိုပြိုင်ပွဲကိုအနိုင်ရရမည်ဟုမျှော်လင့်နေခဲ့သည်။

ကျန်းရွေ့ကရှုလင်ကျားကိုဖယ်ရှားနိုင်ခဲ့သည်ဟု ချီကွမ်းယာကြားခဲ့ရလေရာ တစ်ဖက်လူကိုအလွန့်အလွန်မျှော်မှန်းထားမိသည်။ ဤအခိုက်အတန့်၌၊ သူတို့ယှဥ်ပြိုင်နေချိန်တွင် တစ်ဖက်လူ၏အာရုံခံနိုင်စွမ်းနှင့်ခန့်မှန်းနိုင်စွမ်းက အလွန်တိကျသည်ကိုသူတို့ခံစားမိလိုက်ပေမဲ့ သူတို့ဟာသူတို့လှုပ်ရှားမှုတွင်လျင်မြန်ကာ တုံ့ပြန်ရာတွင်မြန်ဆန်ရမည်ဖြစ်သည်။ သို့သော် အထင်နှင့်အမြင်လွဲနေခဲ့သည်။

သူအနည်းငယ်စိတ်ပျက်သွားရကာအော်လိုက်မိသည်။

"မင်းဘာလုပ်နေတာလဲ။ မင်းငါ့ကိုအထင်သေးနေတာလား။ မင်းရဲ့ခွန်အားတွေအကုန်လုံးကိုထုတ်သုံးလိုက်စမ်းပါ!"

ထိုသို့ပြောလိုက်ရင်းဖြင့် ချီကွမ်းယာကချိပ်စည်းတစ်ခုပြုလုပ်ကာ အနောက်လှည့်လိုက်သည်။ ဓားရှည်ထဲမှစစ်မှန်သောစွမ်းအားပေါက်ထွက်လာကာ ကျန်းရွေ့ကိုတိုက်ခိုက်လာပြီး သူ့ကိုခွန်အားအကုန်သုံးအောင်ပြုလုပ်နေပေသည်။

ကျန်းရွေ့မှာထိုပုဂ္ဂိုလ်နှင့်ဆွေးနွေးလိုက်ပြီး သူ၏ယုံကြည်ချက်မြင့်တက်သွားကာပြောလိုက်သည်။

"ဒါဖြင့်ကျွန်တော်ကြိုဆိုလိုက်ပါတယ်!"

သူဟာလည်းဓားမြှောက်ကာသူနှင့်တွေ့ဆုံလိုက်သည်။

ဓားနှစ်လက်ထိခတ်သွားကာ ရုတ်တရက်လှိုင်းလုံးကြီးနှစ်လုံးရိုက်ခတ်သွားသည့်နှယ် တစ်နေရာထဲတွင်တုန်ခါသွားသည်။ အက်ရှရှမြည်သံတစ်ခုထွက်ပေါ်လာကာ ကျန်းရွေ့ဓားအောက်ကစွမ်းအားမှာလူနှစ်ယောက်ကိုလွှမ်းခြုံသွားသည်။

ချီကွမ်းယာဟာလည်းအရမ်းကိုခွန်အားကြီးသည်။ သူကဤတိုက်ကွက်ကိုချက်ချင်းခုခံလိုက်နိုင်သည်။ သူခြေတစ်လှမ်းနောက်ဆုတ်ကာပြောလိုက်သည်။

"ကောင်းပြီလေ၊ မင်းကမင်းရဲ့ခွန်အားကိုလျှိုထားတာပဲ။ လာစမ်းပါ!"

သူ၏ဓားလားရာပြောင်းလဲသွားကာ သတ်ဖြတ်လိုစိတ်အပြည့်ဖြင့်တစ်ဖန်ပျံတက်သွားပြီး ကျန်းရွေ့ကိုတိုက်ခိုက်လာသည်။

တိုက်ပွဲကိုကြည့်နေသည့်လူများမှာတအံ့တသြဖြစ်သွားကြသည်။ ရှုလင်ကျားကလူအုပ်ထဲတွင်ပုန်းကွယ်ကာ ချီကွမ်းယာကိုအာရုံစိုက်မိသွားသည်။

----ဒီတစ်ခေါက်တစ်ဖက်လူသုံးသွားတာကကွေ့ရီဂိုဏ်း၏သီးသန့်ကျင့်စဥ်၊ ဝမ်ကျန့်ကွေ့ရီပါတကား။

ဂိုဏ်းနှစ်ဂိုဏ်းသည် ကွေ့ရီဂိုဏ်းကလင်ရှောင်းဂိုဏ်း၏ဓားရေးကျင့်စဥ်ကိုခိုးမခိုးနှင့်ပတ်သတ်၍ နှစ်ပေါင်းများစွာအငြင်းပွားနေခဲ့ကြ၏။ ရှုလင်ကျားလည်းထိုကိစ္စ၏အဖြစ်မှန်ကိုမသိသေးပေမဲ့ စိတ်သစ်လူသစ်ဖြစ်သွားပြီးနောက်တွင် တစ်ဖက်လူ၏ဓားလှုပ်ရှားမှုကိုအနည်းငယ်နားလည်လာသည်။

ချီကွမ်းယာတွင်ဓားတစ်လက်သာရှိပေမဲ့ သူ့လက်ထဲရှိဓားမှာမရေတွက်နိုင်သော မတူညီကွဲပြားသည့်စွမ်းအင်ကိုအသုံးပြုနိုင်သည်။

သူ့ဓားကားပြောင်းလဲသွားကာ ကောင်းမွန်စွာမကိုင်တွယ်နိုင်ပုံပေါက်ပေမဲ့ တကယ်တမ်းအစစ်အမှန်တိုက်ခိုက်ချက်မှာ ဓားစွမ်းအင်ထဲတွင်ပုန်းကွယ်နေပြီး ကြိုတင်ခန့်မှန်း၍မရနိုင်ကာ ၎င်းကိုခွဲခြားရန်ခက်ခဲသွားစေသည်။

ယင်းကားနတ်ဘုရားတို့၏အသိစိတ်ထဲရှိ"မိုးကြိုးဓားသွား"နှင့်တူသည်ဟုရှုလင်ကျားရုတ်ခြည်ခံစားလိုက်ရသည်။ သင့်အတွေးများမှာရှုပ်ယှက်ခတ်နေပြီး ပျော်ရွှင်မှုနှင့်ဝမ်းနည်းမှုတို့မှာကွဲပြားသောစိတ်ခံစားချက်များဖြစ်သော်လည်း၊ ၎င်းတို့မှာသူ့အကြောင်းပြချက်နှင့်သူရှိသည်။

လူတစ်ယောက်၏စိတ်ခံစားချက်၇ရပ်နှင့် လိုအင်ဆန္ဒ၆ရပ်တို့မှာ

ကြိမ်ဖန်များစွာလှည့်လည်လျက်ရှိပြီး ၎င်းတို့ကအဘယ်ဆီသို့သွားသင့်သနည်း။

အခြားသောအံ့သြဖွယ်ကောင်းသည့်အရာကား ကျန်းရွေ့၏တုံ့ပြန်သောအစွမ်းအစမှာ ဤရက်များအတောအတွင်း၌ ကြီးမားစွာတိုးတက်လာပုံပေါ်ပြီး သူဟာချီကွမ်းယာ၏လျင်မြန်သောဓားကွက်တစ်ချက်ချင်းစီကို ခုခံတိုက်ခိုက်နိုင်စွမ်းရှိသည်။

သို့သော်လည်း နှစ်ယောက်ကြားရှိပြင်းထန်သောတိုက်ပွဲ၏အလယ်တွင် တစ်ခုခုကွဲကြေသံနှင့်အတူရောယှက်နေသည့် စူးရှရှအသံဖျော့တစ်ခုကိုရှုလင်ကျားရုတ်တရက်ကြားလိုက်ရသည်။

အသံကားသူ့နားထဲတွင်တိုက်ရိုက်ပဲ့တင်သံထပ်လာရာ ရှုလင်ကျားမိန်းမောသွားရသည်။ သူကကျန်းရွေ့ကိုတစ်ချက်စိုက်ကြည့်လိုက်မိပြီး သူ့မျက်နှာထားမသိမသာပြောင်းသွားကာ သူအော်ပြောလိုက်မိသည်။

"အားလုံးပဲ၊ အနောက်ဆုတ်ကြ!"

သူ့အသံထွက်လာသည်နှင့် ဆူညံသံတစ်သံဟိန်းထွက်လာကာ ကောင်းကင်နှင့်မြေကြီးတုန်ခါသွားပြီး စိတ်ဝိညာဥ်စွမ်းအားလျှံထွက်လာကာ ကျန်းရွေ့လက်ထဲကဓားမှာတကယ့်ကိုပေါက်ကွဲဖွင့်ထွက်လာတော့သည်!

ကျန်းရွေ့သည်ရှုလင်ကျားထံမှစိတ်ဝိညာဥ်စွမ်းအားနှင့်ပါရမီစွမ်းရည်ကိုရရှိခဲပေမဲ့ သူဟာအပြည့်အဝမသုံးတတ်ပေ။ ပုတီးစေ့ထဲကပုဂ္ဂိုလ်၏အကူအညီဖြင့် သူကလျင်မြန်သောတိုက်ကွက်များပြုလုပ်လာပြီး တိုက်ပွဲမှာပိုမိုပြင်းထန်သထက်ပြင်းထန်လာခဲ့သည်။

တစ်ဖက်တွင် ကျန်းရွေ့၏ပြိုင်ဘက်ကင်းသောစိတ်ဝိညာဥ်စွမ်းအားအလျှံအပယ်၊ အခြားတစ်ဖက်၌ ချီကွမ်းယာကဲ့သို့သောကျွမ်းကျင်သူထံမှပြင်းထန်သောဖိအားကြောင့် ကျန်းရွေ့၏ဓားရှည်မှာရုတ်တရ​က်တောင့်မခံနိုင်တော့ဘဲ ပေါက်ကွဲထွက်လာတော့သည်!

ခုနကရှုလင်ကျားကြားလိုက်သည့််အသံမှာ ဓား၏ကြောက်လန့်တကြားအော်သံဖြစ်ပြီး ၎င်းကပေါက်ကွဲသွားကာ ဓားသွားထဲတွင်အက်ကွဲသံတစ်ခုဖြစ်ပေါ်လာသည်။

ကျန်းရွေ့၏ဓားရှည်မှာဟယ်ဇီကျိုးပေးထားခြင်းဖြစ်ကာ ၎င်းဟာလည်းထူးကဲသောဓားတစ်လက်ဖြစ်သည်။

ပေါက်ကွဲမှုအခိုက်အတန့်၌၊ ဓားသွား၏အကွဲစများမှာ ရုတ်သိမ်းရန်အရမ်းကိုနောက်ကျသွားခဲ့သည့်စိတ်ဝိညာဥ်စွမ်းအားနှင့်ရောယှက်သွားကာ နေရာတိုင်းထံပျံဝဲလာခဲ့သည်။

ကျန်းရွေ့နှင့်ချီကွမ်းယာတို့ဟာအရင်ဆုံးဒဏ်ခံလိုက်ရပြီး ကံအဆိုးဆုံးဖြစ်ကြသည်။ ချီကွမ်းယာမှာသွေးတစ်လုတ်အန်၍ ချက်ချင်းမေ့လဲသွားသည်။

ကျန်းရွေ့ဟာလည်း၎င်းကိုမမျှော်လင့်ထားမိပေရာ သူ့လက်ထဲတွင်လက်နက်မရှိသည်မို့ သူ့ဝတ်ရုံလက်ကိုအမြန်မြှောက်၍သူ့မျက်နှာကိုကာလိုက်ရပြီး တစ်ပြိုင်နက်တည်းတွင်သူနောက်ပြန်ဆုတ်လိုက်သည်။

တစ်အောင့်ကြာသော် ခက်ထန်သောလေပြင်းနှင့်မျက်စိကျိန်းဖွယ်ရာငွေရောင်အလင်းတန်းများကိုသူမြင်လိုက်ရပြီး ဓားကွဲစအသေးစားများမှာလေထဲတွင်ဖမ်းဆုပ်ခံလိုက်ရကာ ပိုမိုစူးရှလာခဲ့သည်။ တိုက်ခိုက်နေကြသည့်လင်ရှောင်းဂိုဏ်းနှင့်ကွေ့ရီဂိုဏ်းသားများသာမက၊ အခြားရပ်ကြည့်နေကြသူများကိုပါသက်ရောက်သွားသည်။

ဟယ်ဇီကျိုးကားသူ့နေရာတွင်ထိုင်နေခြင်းဖြစ်ကာ ဤသည်ကိုမြင်လိုက်ရသော် သူမတ်တပ်ထရပ်၍ဝတ်ရုံလက်ကိုဝှေ့ယမ်းလိုက်သည်။ သူ့ရှေ့ရှိလေပြင်းမှာတမဟုတ်ချင်းရပ်တန့်သွားပြီး

ထို့နောက်ပြန်လိမ့်လာကာ အသေးအမွှားဓားစများကိုအမှုန့်အဖြစ်ပြောင်းလိုက်သည်။

ဟယ်ဇီကျိုးကလှုပ်ရှားမှုပြုလုပ်လိုက်ပြီးနောက် သူအရှေ့ကိုပျံဝဲသွားကာ၎င်းကိုဆုပ်ကိုင်လိုက်သည်။

သူ၏နေရာကားကြည့်ရှုသူတစ်သိုက်၏အစွန်းတွင်ရှိနေခြင်းပင်။ ၎င်းကအနည်းငယ်ဝေးကွာသည်မို့ သူ့ကိုသိပ်မသက်ရောက်ပေ။ အဆိုးဆုံးတစ်ယောက်မှာရှောင်းနဥ်အာဖြစ်ပြီး သူတို့ကိုလာကူညီသည့်အခြားရှင်းဇုန်ဂိုဏ်းသားအများစုမှာလည်းဒဏ်ရာရသွားကြသည်။

သူတို့၏တည်နေရာမှာကျန်းရွေ့အနောက်တွင်ဖြစ်ပြီး ကျန်းရွေ့ကရှောင်လိုက်သည်မို့ ဓားသွားစအများစုမှာပြိုကွဲသွားကာ ဓားချီစွမ်းအားမှာစိမ့်ထွက်လာသည်။

ယင်းချန်ကသူ့ကိုမကယ်နိုင်မီ၊ သူကအခြားတစ်ဖက်ကိုကျယ်လောင်စွာအော်ပြောလိုက်သည်။

"မင်းတို့တွေ ညာဘက်ကိုပြန်သွားကြ!"

ရှောင်းနဥ်အာကခပ်မြန်မြန်သဘောတူလာပြီး အလျင်စလိုဖြင့်သူမမှာဂိုဏ်းသားတစ်ယောက်ကိုသာဆွဲဖို့အချိန်ရလိုက်ကာ ညာဘက်ကိုအမြန်သွားလိုက်ပေမဲ့နှေးနေဆဲဖြစ်သည်။

ထိုစဥ်၊ သူမနံဘေးတွင်ရုတ်တရက်လေညှင်းတိုက်ခတ်သွားကာ ချက်ချင်းပင်သွယ်လျသောဝတ်ရုံနက်ဖြင့်ပုံရိပ်တစ်ခုက သူမရှေ့တွင်ပေါ်လာသည်။

ထိုလူမှာဓားဆွဲထုတ်ဖို့အချိန်မရှိလိုက်ဘဲ ဓားကွဲစများမှာသူ့ရှေ့ရောက်နေပြီးဖြစ်ပေမဲ့ သူကအလွယ်လေးပြုမူကာလက်ကိုအရှေ့မြှောက်လိုက်သည်။

တိုက်ကွက်ထုတ်သုံးစရာမလိုသကဲ့သို့ လက်နက်ဖြင့်တိုက်ခိုက်စရာလည်းမလိုပေ၊ ဤကဲ့သို့အမိန့်ပေးသည့်အပြုအမူနှင့်တင် ပျံဝဲလာသည့်ဓားသွားမှာတကယ့်ကိုလေထဲတွင်တန့်သွားသည်။

ချက်ချင်းပင်၊ သူ၏သွယ်လျလျလက်ငါးချောင်းမှာအောက်ကိုကွေးလိုက်ပြီး သူ၏လက်ဝါးကိုဖိချလိုက်သည်။

ပန်းကန်ပြားပေါ်ပုလဲကျသွားသကဲ့သို့ တတောက်တောက်မြည်သံဆက်တိုက်ထွက်ပေါ်လာကာ ပျံဝဲလာသည့်ဓားသွားစများမှာ မြေပြင်ပေါ်သို့တစ်ခုပြီးတစ်ခုကျသွားသည်။

ထိုအန္တရာယ်ပျောက်ကွယ်သွားတော့သည်။

တစ်ဖက်လူ၏မျက်နှာတစ်ခြမ်းကားမျက်နှာဖုံးဖြင့်ကွယ်နေပြီး ရှောင်းနဥ်အာကသူ့နောက်တွင်ရပ်နေပေမဲ့ သူ့ပါးပြင်ပေါ်ကလှုပ်ခါနေသည့်ဆံနွယ်စများနှင့် မေးစေ့မှလည်တိုင်အထိပြီးပြည့်စုံကာချော့မွေ့သောမေးရိုးလိုင်းကိုသူမမြင်နိုင်သည်။

အရမ်းရင်းနှီးလွန်းတယ်။

အဘယ်ကြောင့်ဆိုသော် တစ်ခါတုန်းက... သူမကအနောက်တွင်ထိုကဲ့သို့ရပ်ကာ လူတစ်ယောက်၏ပုံရိပ်ကိုချိုမြိန်မှုအပြည့်ဖြင့် တိတ်တိတ်လေးကြည့်ခဲ့ဖူးသည်။

ရှောင်းနဥ်အာအသံနိမ့်ဖြင့်ပြောလိုက်သည်။

"ရှစ်ရှုန်းလား။"

ဓားချီကမျက်နှာဖုံးကြိုးကိုဖျက်သွားရာ မျက်နှာဖုံးမှာမျက်နှာမှဖြေးဖြေးလေးလျှောကျလာပြီး ချောမောလှပကာတောက်ပသောမျက်နှာကိုထုတ်ဖော်လာသည်။

ရှုလင်ကျားတုံ့ဆိုင်းမနေဘဲမျက်နှာဖုံးကိုသူ့လက်ထဲယူကာ ၎င်းကိုပစ်၍ပြောလိုက်သည်။

"အင်း၊ မင်းအဆင်ပြေရဲ့လား။"

သူမမျက်ရည်ဝဲလာသည်ကိုရှောင်းနဥ်အာချက်ချင်းခံစားမိလိုက်ပြီး သူမမျက်တောင်အမြန်ခတ်ကာ၎င်းကိုဖယ်ထုတ်၍ ပြောလိုက်သည်။

"ကောင်းပါတယ်။"

သူ့မျက်နှာကိုရှင်းရှင်းလင်းလင်းမြင်လိုက်ကြရရာ လူအုပ်ထဲရှိဆွေးနွေးသောအသံများမှာတစ်ဖန်မြင့်တက်လာပြန်သည်။

ဒီကနေ့ဓားစမ်းသပ်ရေးညီလာခံတွင် ဟယ်ဇီကျိုးတင်သာမက သူ့ပတ်ပတ်လည်ရှိလူအများစုမှာသူ့ကိုလိုက်ရှာနေခဲ့ကြပြီး ဤညီလာခံ၏ဖြစ်နိုင်ချေအရှိဆုံးအနိုင်ရသူမှာ ဒဏ်ရာအပြင်းအထန်ရပြီးနောက်တွင် ဒီကိုလာပါအုံးမလားဟုကြည့်ချင်နေကြသည်။

သို့သော် ရှုလင်ကျားဓားရာအမှတ်အသားစမ်းသပ်ချက်ဝင်ပြိုင်သည်ကို မမြင်ရကတည်းက၊ တစ်ဖက်လူကဤနေရာကိုလာမှာမဟုတ်တော့ဟု သူတို့အကုန်လုံးတွေးမိကြသည်။

ရှုလင်ကျားကားတောင်ထွတ်ဂိတ်ဝထဲဝင်ပြီးသားဖြစ်ကာ ဤကဲ့သို့အံ့သြဆန်းကြယ်သောနည်းလမ်းဖြင့်ပေါ်လာမည်ဟု မည်သူမျှမထင်ထားမိကြပေ။

သူ့လက်ကိုမြှောက်လိုက်ချိန်တွင် သူစိတ်ငြိမ်သွားသည်။ အဓိကအချက်ကားစိတ်ငြိမ်ရန်နှင့်အထိန်းအကွပ်မဲ့ခြင်းဖြစ်ကာ သူ့မျက်နှာထားမှာတည်ငြိမ်လျက်ရှိသည်။ ကျန်းရွေ့နှင့်ယှဥ်လျှင် သူ၏ကိုယ်နှုတ်အမူအရာနှင့်အကျင့်စရိုက်ကား တစ်ဦးတည်းကွဲထွက်နေပြီး သူကကျော်ကြားမှုကိုရုတ်ခြည်းသိမ်းယူသွားသည်။

ရှုလင်ကျားကိုမြင်လိုက်ရရင်း လင်ရှောင်းဂိုဏ်းကသတင်းအချက်အလက်ရယူရန်ပို့လိုက်သည့်ဂိုဏ်းသားမှာအံ့သြသွားပြီး ပျော်ရွှင်ဝမ်းမြောက်စွာဖြင့်အမြန်ပြောလိုက်သည်။

"ရှစ်စွင်း၊ အဲ့ဒါရှုရှစ်ရှုန်းပဲ!"

သို့သော် ၎င်းကသူ့ကိုရှာရလွယ်သွားစေသည်။

ဟယ်ဇီကျိုးကလည်းမြင်လိုက်သည်။

သူမနေနိုင်ဘဲမျက်လုံးမှေးစင်းလိုက်မိကာ သူ့မျက်နှာမှာအေးစက်နေပေသည်။

ခုနကရှုလင်ကျားကိုလူအုပ်ထဲတွင်ရှာမရခဲ့ပေ။ သူကမြေခွေးမျိုးနွယ်စုလူစုကွဲသွားခြင်း(သို့) လမ်းမှာမတော်တဆတစ်ခုခုဖြစ်နေသည်ဟု ဟယ်ဇီကျိုးတွေးမိကာ သူ့ကိုရှာရန်နေရာတိုင်းတွင်လူလွှတ်ခဲ့ပေမဲ့ တစ်ဖက်လူကသူ့နှာခေါင်းအောက်တွင်အမြဲရှိနေခဲ့မည်ဟု သူဘယ်တုန်းကမျှမတွေးခဲ့မိပေ။

ဟယ်ဇီကျိုးအလွန်လျင်မြန်စွာတုံ့ပြန်လိုက်နိုင်ပြီး ရှုလင်ကျားကဓားရာစမ်းသပ်ချက်ကိုဝင်မပြိုင်ဘဲ တောင်ထွတ်ဂိတ်ဝကိုဝင်နိုင်စွမ်းရှိနေမှတော့ ဖြစ်နိုင်ချေတစ်ခုသာရှိသည်ကိုချက်ချင်းတွေးမိလိုက်သည်။

ချင်းချိုးမှာအနီရောင်ဖိတ်ကြားလွှာမရှိပေမဲ့ ၎င်းကိုဘယ်ကရလာမှန်းသူမသိပေ၊ ရှုလင်ကျားကသူမသိအောင်ဖုံးကွယ်ထားခဲ့သည်။

ခုနကထိုရယ်ချင်စဖွယ်စိတ်ပူမှုများကိုတွေးမိရင်းဖြင့် ဟယ်ဇီကျိုးမနေနိုင်ဘဲလှောင်ပြုံးပြုံးလိုက်မိသည်။

ကောင်းတယ်၊ အရမ်းတော်တယ်။

သူမတ်တပ်ထရပ်ကာ ရှုလင်ကျားထံလျှောက်သွား၍ ပြောလိုက်သည်။

"လင်ကျား။"

ရှုလင်ကျားအနောက်လှည့်ပြီးမကြာမီတွင် ဟယ်ဇီကျိုးကိုမြင်လိုက်ရတော့သည်။

တကယ်တော့ ကျင့်ကြံသူများအတွက် ဆရာနှင့်တပည့်မတွေ့ရသည့်အချိန်ကာလမှာသိပ်မရှည်ကြာပေ။

ပုံမှန်အားဖြင့် ရှုလင်ကျားကတောင်အောက်ဆင်းကာခရီးသွားလေ့ရှိကာ တစ်ခါတရံကျရင် ၎င်းကလပေါင်းများစွာကြာတတ်သည်။

သို့ပေမဲ့ ဤအခြေအနေတွင် စိတ်အခြေအနေပြောင်းလဲသွားကာ မည်သူမည်ဝါဖြစ်ကြောင်းလည်းပြောင်းလဲသွားခဲ့ပြီ။ ထိုခံစားချက်မှာ မိတ်ဆွေဟောင်းကိုတစ်ဖန်ပြန်တွေ့ရသည်နှင့်တူသည်။

ဟယ်ဇီကျိုးကသူ့နာမည်ကိုခေါ်လာချိန်တွင် သူ၏လေသံနှင့်အမူအရာမှာယခင်ကနှင့်အတူတူပင်ဖြစ်သည့်တိုင်၊ သူကသူ့အနောက်ရှိနေရာတွင်မဟုတ်တော့ပေ။

ရှုလင်ကျားခေါင်းငုံ့ကာအရိုအသေပြုလိုက်သည်။

"ရှစ်စွင်း။"

လူတွေရှေ့မှောက်တွင် ဟယ်ဇီကျိုးကဘာမှမပြောဘဲ သာမန်ကာလျှံကာခေါင်းငြိမ့်ပြကာပြောလာသည်။

"မင်းဘာလို့မလာတာလဲဆိုတာကိုငါအခုပဲပြောနေတာ၊ ငါကမင်းရဲ့ရှစ်တိကိုမင်းကိုသွားရှာခိုင်းတော့မလို့ကို မင်းကရောက်လာပြီးသားဖြစ်နေတာပဲ။ ကောင်းတယ်၊ ဒီကိုလာ၊ ​ညီလာခံစဖို့သိပ်မလိုတော့ဘူး။"

သူ၏လေသံကား အရင်ကဖြစ်ရပ်မှာဘယ်တုန်းကမျှမဖြစ်ခဲ့သည့်နှယ်။

သံသယမရှိ၊ မကျေနပ်ချက်မရှိ၊ စိတ်ပျက်မှုမရှိ။

သို့မဟုတ် ဟယ်ဇီကျိုး၏နှလုံးသားထဲတွင် ဒါကိုလေးနက်သောကိစ္စဟုမထင်သည်မို့ သူအရမ်းကိုတည်ငြိမ်ကာသာမန်ကာလျှံကာဖြစ်နေနိုင်ခြင်းပင်။

သို့သော်ရှုလင်ကျားကတော့မလုပ်နိုင်ပေ။

သူမသိမသာတောင့်တင်းသွားရကာ မသိလိုက်မသိဘာသာဖြင့်ထုတ်ပြောလိုက်မိသည်။

"ကျွန်တော်...ကျွန်တော်မလိုက်ဘူး။"

လူကြားထဲတွင် သူ့ဆရာသခင်ရှစ်စွင်းထံမှ ဤကဲ့သို့ပျော့ပြောင်းညင်သာသောအမူအရာဖြင့် ချော့မြူခံရသော်လည်း၊ သူကပါးစပ်ဟ၍ငြင်းဆန်လိုက်နိုင်သည်မို့ ရှုလင်ကျားကားနံပါတ်တစ်သတ္တိအရှိဆုံးလူတစ်ယောက်ဟုယူဆ၍ရသည်။

သူဒါကိုပြောလိုက်သော် ပတ်ပတ်လည်ရှိဂိုဏ်းသားများမှာ လေထုအေးစက်သွားသည်ကိုသာလျှင်ခံစားမိလိုက်ပြီး ဟယ်ဇီကျိုးဘေးမှာရပ်နေကြရင်းဖြင့်အသက်ပင်ရှုမထုတ်ရဲပေ။

ယင်းချန်မှာအစကတော့သိမ်းသွင်းချင်ပေမဲ့ သူ့ပါးစပ်ဟလိုက်သော် ရှုလင်ကျားနှင့်ယခင်ကစကားဝိုင်းကိုရုတ်ခြည်းသတိရသွားကာ သူတန့်သွားရပြီး စကားလုံးများကိုပြန်မျိုချလိုက်မိသည်။

ရှောင်းနဥ်အာကြောက်လန့်သွားရကာ ဟယ်ဇီကျိုးကဒေါသတကြီးရိုက်ချက်ဖြင့် ရှုလင်ကျားကိုသေလုမတတ်ပါးရိုက်ချလိမ့်မည်ကိုကြောက်နေမိသည်မို့ သူမကသူ့ဝတ်ရုံလက်ကိုလှမ်းဆွဲကာတိုးတိုးပြောလိုက်မိသည်။

"ရှစ်ရှုန်း၊ ရှစ်ရှုန်း၊ အရမ်းခေါင်းမမာပါနဲ့၊ ကောင်းကောင်းရှင်းပြလိုက်လေနော်။"

မည်သူ၏တပည့်ဂိုဏ်းသားများမှ ဤမျှလောက်ထိမနာမခံမလုပ်ရဲပေ၊ ဟယ်ဇီကျိုးမှာတကယ်ပဲသူ့ကိုနည်းနည်းလေးရိုက်ပစ်လိုက်ချင်မိသည်။ ရှုလင်ကျားကနှုတ်ခမ်းတင်းတင်းစေ့ထားသည်ကိုမြင်လိုက်ရရင်း ဟယ်ဇီကျိုးရင်ဘတ်အနည်းငယ်လေးလံသွားရကာ သူ့ဒေါသကိုဖိနှိပ်ထားလိုက်သည်။

သူတည်ငြိမ်စွာပြောလိုက်သည်။

"မင်းဒဏ်ရာအပြင်းအထန်ရပြီးကတည်းက မင်းစိတ်အခြေအနေမကောင်းဘူးလို့ငါတွေးမိတယ်။ မင်းခဏအနားယူလိုက်တာကောင်းပါတယ်၊ ဒီတော့မင်းတောင်ပေါ်ကထွက်သွားတာကို ငါခွင့်လွှတ်ပေးလိုက်မယ်။ လင်ကျား၊ ဒီရက်တွေအများကြီးကြာပြီးနောက်မှာ မင်းပြဿနာရှာတာတော်လောက်ပြီ။"

ဟယ်ဇီကျိုး၏နောက်ဆုံးစကားမှာအေးစက်နေပြီးသားဖြစ်ကာ ရှုလင်ကျားကစကားမပြောပေ၊ လေထုကားတစ်ခဏမျှပိုမိုတိတ်ဆိတ်ကာ တင်းမာလာချေသည်။

ထိုစဥ်၊ တောင်ထွတ်ဂိတ်ဝအပြင်ဖက်ရှိစမ်းသပ်မှုမှာလည်းပြီးဆုံးသွားခဲ့ပြီ။

ဓားစမ်းသပ်ရေးညီလာခံတွင်ပါဝင်ယှဥ်ပြိုင်ရန်အရည်အချင်းပြည့်မှီသည့်ကျင့်ကြံသူများမှာ နန်ဇီတောင်ထွတ်ထဲကိုတရားဝင်ဝင်ရောက်လာကြပြီး နန်ဇီဂိုဏ်းသားများကသူတို့အတွက်မတူညီသည့်နေရာများတွင်ထိုင်ခုံများစီစဥ်ပေးထားကြသည်။

ထိုအခိုက်၊ တစ်ယောက်ယောက်ကရောက်လာပြီးပြောသည်။

"ရှုသခင်လေးနဲ့အခြားဂိုဏ်းသားတွေက ကျွန်တော်နဲ့လိုက်ပြီးထိုင်ခုံနေရာယူပေးကြပါ။"

စားပွဲနှင့်ထိုင်ခုံများမှာ သူညွှန်ပြသည့်နေရာတွင်စီစဥ်ပြီးသားဖြစ်သည်၊ အဘယ်ကြောင့်ဆိုသော် ရှုလင်ကျားတစ်ဦးတည်းကျင့်ကြံသူတစ်ယောက်ဖြစ်သည်မို့ မည်သူမည်ဝါဖြစ်ကြောင်းရောက်ရှိလာချိန်တွင် သူ၏နေရာမှာချီဇုန်နှင့်အတူမဟုတ်ဘဲ သူ့နံဘေးတွင်သီးသန့်ထိုင်ခုံတစ်ခုံစီစဥ်ပေးထားသည်။

ယင်းကားနှစ်ဖက်ကြားရှိရန်စောင်မှုကဲ့သို့ပင်။ ဂိုဏ်း၏ဆန့်ကျင်ဘက်တွင် သူကတစ်ဦးတည်းရပ်ကာ လူတို့အတွက်အလွန်ထူးဆန်းပြီးအဓိပ္ပါယ်မရှိသောနိယာမကိုလိုက်နာနေသည်မှာ မဖော်ပြနိုင်လောက်အောင်အရှက်ရမှုတစ်ရပ်ပင်။

မည်သူမျှမလှုပ်ရှားသည်ကိုမြင်လိုက်ရရာ နန်ဇီဂိုဏ်းသားကမျက်နှာထက်တွင်ထူးဆန်းသောအမူအရာတစ်ခုဖော်ပြလာသည်။

ရှုလင်ကျားပြောလိုက်သည်။

"ရှစ်စွင်း၊ ရှစ်စွင်းကျွန်တော့်ကိုပြုစုပျိုးထောင်ပြီး ပညာသင်ပေးခဲ့တဲ့အတွက် ရှစ်စွင်းကျွန်တော့်ကိုပေးခဲ့တဲ့ကြင်နာမှုကို ကျွန်တော်မမေ့ရဲသလိုမေ့လည်းမမေ့ပါဘူး၊ ပြီးတော့ ကျွန်တော်အတိတ်နဲ့ပတ်သတ်ပြီးတော့လည်း စောဒကမတက်ချင်ဘူး။ အမှန်ဆိုကျွန်တော်ဂိုဏ်းကမထွက်သွားချင်ဘူး။ ကျွန်တော်ကနှစ်နှစ်တာဒဏ်ရာအပြင်းအထန်ရခဲ့ပြီးတော့ ကျွန်တော့်မှာစဥ်းစားစရာတွေအများကြီးရှိတယ်။ တကယ်လို့အနာဂတ်မှာဂိုဏ်းထဲမှာလိုအပ်တာရှိရင် လင်ကျားသေချာပေါက်အတတ်နိုင်ဆုံးကူညီပေးမှာပါ၊ ဒါပေမဲ့ တခြားဟာတွေထက် ရှစ်စွင်းက..."

သူအနည်းငယ်တန့်သွားကာပြောလိုက်သည်။

"ဂိုဏ်းမှာကျွန်တော်လိုတပည့်မျိုးတစ်ခါမှမရှိခဲ့ပါဘူး။"

စကားပြောပြီးနောက်၊ ရှုလင်ကျားခေါင်းငုံ့ကာ အနောက်လှည့်၍သူ့နေရာထံလျှောက်လာလိုက်သည်။

သို့သော် ထိုအခိုက်အတန့်တွင် တစ်ယောက်ယောက်ရောက်လာကာ အော်ခေါ်လာသည်။

"ရှုရှစ်တိ!"

ရှုလင်ကျားလှည့်ကြည့်လိုက်သော် ကျင်းဖေးထုန်ဖြစ်နေကြောင်းမြင်လိုက်ရသည်။

သူ့နံဘေးတွင်မည်သူမျှမရှိပါဘဲ သူကရှုလင်ကျားကိုနှုတ်ဆက်ကာ သူ့လက်ကိုတိုက်ရိုက်ဆုပ်ကိုင်လာပြီး အပြုံးတစ်ပွင့်ဖြင့်ပြောလာသည်။

"မင်းလည်းဒီမှာရှိနေတာအရမ်းကောင်းတယ်၊ ကိုယ်မင်းကိုနေရာတိုင်းမှာလိုက်ရှာနေခဲ့ရတာ။"

သူကသူ့နေရာကိုညွှန်ပြကာဆိုသည်။

"ဒီတစ်ခေါက်ဓားစမ်းသပ်ရေးညီလာခံက ကိုယ့်ကိုဝင်ပြိုင်ခွင့်မရှိတဲ့ကိုယ်စားလှယ်အဖြစ်နဲ့ တက်ရောက်ဖို့ဖိတ်ကြားလာတယ်လေ။ ကိုယ်မငြင်းနိုင်တော့လက်ခံလိုက်ရတာပဲ။ ကံဆိုးချင်တော့ အဲ့နေရာမှာတစ်ယောက်ထဲထိုင်နေရတာတကယ်ပျင်းစရာကောင်းတယ်။ ကိုယ်နဲ့အတူလာထိုင်ပါလားကွာ။"

ကျင်းဖေးထုန်၏နေရာကားချီဇုန်နှင့်ဝေးကာ သူ့မှာလည်းပြိုင်ပွဲကွင်းပြင်၏အခြားတစ်ဖက်တွင်သီးသန့်ထိုင်ခုံတစ်ခုံရှိနေပေမဲ့ ဤတစ်ကြိမ်ဒီကိုလာတာကသိသာစွာပင် ရှုလင်ကျားကိုဖေးမချင်နေသည်ပင်။

ရှုလင်ကျားမှာသူ၏အပြုအမူနှင့်အနည်းငယ်စိမ်းနေသေးပေရာ မသိလိုက်မသိဘာသာဖြင့်သူ့လက်ကိုဆွဲထုတ်လိုက်မိသည်။

ကျင်းဖေးထုန်ကသူ့လက်ကိုလွှတ်ပေးလိုက်ပေမဲ့ သူ့ဝတ်ရုံလက်ကိုဖြတ်၍လက်ကောက်ဝတ်ကိုပြောင်းကိုင်လာကာ ရှုလင်ကျားကိုတိတ်တိတ်လေးကြည့်သည်။

ထိုမျက်လုံးတစ်စုံကားကြည်လင်ကာတောက်ပလျက်ရှိပြီး မျက်ဝန်းထဲတွင်ကရုဏာစိတ်၊ သနားကြင်နာစိတ်နှင့်ပဟေဠိဖြစ်မှုတို့မရှိပါဘဲ အလွန်တည်ငြိမ်ကာသိမ်မွေ့သောအကြည့်ဖြစ်သည်။

သူကညင်သာစွာဆိုသည်။

"ကိုယ်မင်းကိုလာဖိတ်တာမို့ မင်းကိုယ့်ကိုမျက်နှာသာပေးရမယ်လေ၊ သွားရအောင်။"

သူ၏နှလုံးသားရုတ်ခြည်းအေးခဲသွားရကာ ခံစားချက်မျိုးစုံကသူ့ထံရုတ်တရက်ဝင်ရောက်လာသည်။

ဤစကားနှင့်ဤအကြည့်တစ်ချက်မျှဖြင့် သူ့ရင်ထဲတွင်ဘာဖြစ်နေလဲ၊ သူဘာကြောင့်လုပ်ခဲ့လဲဆိုသည်ကို သူစကားတစ်ခွန်းပင်ပြောစရာမလိုဘဲ ဤလူကအရာအားလုံးကိုနားလည်သည်ဟု ရှုလင်ကျားရုတ်ခြည်းခံစားလိုက်ရသည်။

ခုနကမပြောအပ်သောမွန်းကြပ်မှုနှင့်အမျက်ဒေါသတို့မှာ မြူခိုးဖြူကိုဖြတ်၍တိုက်ခတ်လာသောလေညှင်းနှယ် အများစုမှာရုတ်တရက်ပျောက်ကွယ်သွားခဲ့သည်။ ရှုလင်ကျားမျက်လွှာချလိုက်မိပြီး မျက်လုံးတစ်ဖန်ပြန်ပင့်ကာပြုံးပြလိုက်မိသည်။